مش حتقدر تغمض عينيك.. ادخل ودعيلى..

بسم الله والصلاة والسلام على رسول الله صلى الله عليه وسلم...

مع كل جرة قلم ومع كل لحظه فكر ....مع كل دمعة عين ومع كل لحظة ذكر... ينطق القلب قبل اللسان..بحبك يارب...مع كل سجدة شوق وكل دقة قلب..مع كل نظرة لفوق وكل دمعة شاب...تنطق الروح قبل الكيان.... بحبك يارب...

احبتى اخوانى واخواتى ياترى ايه اخبار حب ربنا فى قلوبكم..ياترى ايه اخبار الرحمات ..ايه الرسايل وصلت ولالسه القلب اتعلق ولا لسه..العين دمعت ولا لسه... يارب ترزقنا حبك وتمن علينا برحماتك وفضلك...

النهاردة بقى حان الوقت مع مدفع رمضان او تقدر تقول قنبلة رمضان ..انا قلت حتاخر عليكم شوية بس مقدرتش ..حبه قومنى من احلى نومة خلانى اتنفض لما سمعت كلامه سمعت حتة ايه..يارب تصحيكم انتم كمان ..بس اوعوا تقولو للمسحراتى عليا احسن يقول عليا بقطع عليه وبصحيكم بداله...اسمع كده ياسيدى وادعيلى ..الايه بتقول....

{أَفَمَنْ هُوَ قَآئِمٌ عَلَى كُلِّ نَفْسٍ بِمَا كَسَبَتْ وَجَعَلُواْ لِلّهِ شُرَكَاء قُلْ سَمُّوهُمْ أَمْ تُنَبِّئُونَهُ بِمَا لاَ يَعْلَمُ فِي الأَرْضِ أَم بِظَاهِرٍ مِّنَ الْقَوْلِ بَلْ زُيِّنَ لِلَّذِينَ كَفَرُواْ مَكْرُهُمْ وَصُدُّواْ عَنِ السَّبِيلِ وَمَن يُضْلِلِ اللّهُ فَمَا لَهُ مِنْ هَادٍ }الرعد33

يانهااار ابيض لسه نايم....حفهمك ..بس استنى نشرح الايه زى ما العلماء قالوها وبعدين نشوف الجمال...

ربنا بيقول أفمن هو قائم كل نفس يعلم ماتعمل من خير او شر ويُحصيه عليها ولا تخفى عليه خافية(ابن كثير), أحق أن يعبد, أم هذه المخلوقات العاجزة؟ وهم من جهلهم جعلوا لله شركاء مِن خَلْقه يعبدونهم, قل لهم -أيها الرسول-: اذكروا أسماءهم وصفاتهم, ولن يجدوا ما يجعلهم أهلا للعبادة, أم تخبرون الله بشركاء في أرضه لا يعلمهم, أم تسمونهم شركاء بلفظ فقط من غير حقيقة. بل زين الشيطان للكفار قولهم الباطل وصدَّهم عن سبيل الله. ومَن لم يوفِّقه الله لهدايته فليس له أحد يهديه..(التفسير الميسر)..

يا ياربى ياحبيبى على الامان اللى بتدهولى ..لما بتحسسننا ان مفيش حد غيرك فى ايده اى حاجه لما عظمتك وجبروتك بيخشوا جوة قلب الواحد...

ايه لسه معرفتهوش ؟؟...لسه معرفتش مين ربنا....مين اللى احنا بنعبده...مين الللى احنا بنسجدله...

عشان نشتاقله لازم نعرفه يااخوانا.....وعشان نعرفه لازم نقدره..احنا مقدرناش ربنا حق قدره..احنا قدرنا الدنيا حق قدرها... قدرنا السيارات حق قدرها ...قدرنا الموبايلات حق قدرها ..لكن مقدرناش العظيم حق قدره...

اللى اكل حرام واللى سمع حرام واللى زنا واللى غش ...مقدروش ربنا حق قدره.

لما روحناله وكنا محتاجينله,واول ما فك كربنا سيبناه تانى...مقدرناش ربنا حق قدره..

اللى بيقول الله اكبر ويكبرفى صلاته وقلبه لسه فى الشغل...واللى تكبر وقلبها لسه فى المطبخ...

واللى يكبر وقلبه لسه مع اللى شافها وهو داخل المسجد....مقدروش ربنا حق قدره...

ياجماعه ..يااخوانا ده لما الاحساس بعظمة ربنا وقدره جه فى قلب الجبل الاصم جبل الطور..بقى ترااب ...خر..اتهد..الجرانيت والحجر اتفتتوا..شوف بقى لما يجى فى قلبك حيعمل ايه...

انت ايه بقى؟؟؟؟؟؟حرام عليك...توب بقى..

ياااااه ..لما تحس بعظمة ربنا ..ياااه لما تعرف مين اللى بنصومله ..مين اللى بنصليله..مين اللى بندعيه ويدينا..

لو عرفته حتحبه ولو حبيته حتشتاقله ولو اشتاقتله حتعيش حياتك كلها عشان ترضيه..عشان تشوفه...

انت متخيل بقى لما تشوفه ...ياااه...متخيل لما تشوف حبيبك اللى عشت حياتك كلها عشان اللحظه دى..ربنا ...الله...العظيم... مش حتقدر تضحى بشوية حاجات خايبه وهايفه عشانه.....عشان يوصلك الاحساس به وبقدره...

اه ه ه لو عرفناه ...اه ه ه لو عرفنا الله معرفة حقيقية...احنا عيزين نسمع عن ربنا لحد ماقلوبنا ترتجف ....لحد ما كل ذرة فى كياننا..تهتف ..بحبك يارب..

روحله بقى...كفايه بعد..كفايه كبر..توووب بقى..

انتم زاهدين فى ربنا ليه؟؟؟ ليه؟؟؟ مش عيز تعرفه ليه؟؟؟

ياجماعه انتم لو شوفتم اللى عند ربنا لو عرفت اللى هو شايلهولك...مش حتشيل هم حاجه ابدا...اوعى تفكر ولا تفكرى..انه مثلا لو اخر عليك نعمة يبقى حارمك..لا ..ده يبقى بيحبك والله...هو اللى عارف مصلحتك..

اديك مثال..

ليه ميبقاش مثلا اخر عنك الجواز شويه..عشان عيزك ..عشان بيحبك..عيزك تبقى فاضيله شويه وحابب يسمع صوتك فى العبادة..حابك تبقى معاه ..حابب محدش ياخدك منه ...يابختك ياعم..

قبل مانتشغل بالعيال والمسئوليه والشغل والمطبخ..ومانلاقيش وقت...عيزك تبقى جامد كده عشان يديك حاجه جامده...حيهاديك باجمل حد لما تبقى صالح ..يعنى بيربيك ...

بيكبرك عشان يديك هدية كبيرة..ايه مش عايز؟؟؟ وسبحان الله يااخى على طاقة الحب اللى حيديهالك لشريكك ..حتشوف ..عارف ليه عشان انت بتحب ربنا فحيخليك تحب كل حاجه هو اديهالك وحلال...

بحبك ياربى وحعيش عمرى ليك....

انت عارف لما قطر الندى اتجوزت وهى رايحه لعريسها ابوها وكان السلطان...عمل ليها فى كل بلد تعدى عليها قصر..استراحة يعنى..عملها القصر ليه باجماعة؟؟عمله عشان بيحبها وهى غالية عنده...ولله المثل الاعلى..

تخيل بقى لما ربنا..اه..ربنا...لما ربنا يحبك حيعملك ايه؟؟ايه ولا ايه...حيخليلك فى كل خطوة قصر..قصر من السعادة ..قصر من الراحة..قصرمن الرحمة..قصر من الحب..حيفتحلك قلوب كل اللى نفسك انهم يحبوك..حيخليك عبده وحبيبه...ايه انت مش واثق فى ربنا ولا ايه...

ياجماعة ده ربنا بكلمة..بكلمة ..ايوة بكلمة يااخوانا...

بكلمة...خلق 400 مليار مجرة سماوية.. وبكلمة... حيهدهم.

بكلمة... خلق 2 مليون كائن حى ........ وبكلمة... حيموتهم.

بكلمة... خلق النار وخلاها تحرق.........وبكلمة.... خلاها برد وسلام.

بكلمة.. خلق السحاب وخلاه يروى ويمطر.. وبكلمة ...خلاه نار على قوم عاد..

اوعى تستهتر بعظمة ربنا...انا عيزك تروحله..تروحله وتقوله مقدرش اخسرك يارب ..

محتاجلك وماليش غيرك...مقدرش ابعد عنك...محتاج رحمتك...انا ضعيييف.....انا ولا حاجة..وانت كل حاجة...

ياسلااام ..ياسلام لما يشوف مرسوم على وشك احسن ملمح بيحب يشوفه..ملمح الانكسار والذل بين ايديه..

لما نشيل عن وشنا الماسكات اللى حاطنها..ماسكات الكبر والغرور والغش

لمانبقى بين ايديه وننسى كل حاجة شغلانا...

احنا فى الجزء الاول شحنا البطاربات كده..وفى التانى قلنا نصلح نفسنا ووصينا بشوية حاجات تخليه يحبنا...وفى التالت قلنا نعلق ورق على الحيطه وعلى العربيات مكتوب عليه بحبك يارب....وطبعا كل ده متعملش ..اناعارف...

المرة دى بقى حنبتدى نورى الناس حب ربنا فى قلوبنا ..احنا خدناها واحدة واحدة ودلوقت وقت الشغل ...التوصية المرة دى....انا عايز الاف الشرايط والكتب تتوزع بعد الكلام ده..عيزك توزع اى حاجه قريتها او سمعتها واثرت فيك...عيزين كل واحد دخل السلسلة دى واثرت فيه.. يبتدى بقى يورى حبه لربنا ..

عيز فيضاناااات الدعوة لربنا تشتغل ...عيز تسونامى الاسلامى...اى حاجه ان شا الله ورقه..كلمة..موقع نت...

وتقوله انا بعمل كده ليك يارب..انا وقف لله...انا بتاعك ...ارضى عنى بقى...اقبلنى وتب عليا يارب...

وفى حاجه كمان لينا بقى عشان ننول حب ربنا...عيزين منطلعش من هنا الا لما بنقول لحد بحبك فى الله ...مش شرط يبقى معانا فى المنتدى تخيلوا بقى مع ردودكم حيبقى اد ايه متحابين فى الله...وكام حد حيتالف بين قلوبهم..وممكن تكون الصفحه دى هى اللى تخلينا تحت ظل عرش الرحمن....

عيزين نلم الامة ياجماعة..عيزين نحب بعض عشان نقدر ننهض تانى...يالا مستنى ردودكم ..وردكم على بعض فى حب الله....

معلش طبعا للتطويل..بس والله مش بايدى ..الواحد بيقول حكتب كلمتين ومش عارف حجيبهم ازاى..وانا بخلص ببقى مش عارف اودى الكلام فين..سبحانه الفتاح ...الرحيم..

بحبكم فى الله واملى الكلام ده يجيب نتيجه.......
..
منقول

__________________

مش حتقدر تغمض عينيك.. ادخل ودعيلى.. 409862790

مش حتقدر تغمض عينيك.. ادخل ودعيلى.. 8616

» ادخل للاهمية
» هل تحب أمك حقا ...ادخل واختبر نفسك....!!
» اى قلب هو قلبك بسرعه ادخل !!!!!!!!!!!
» ادخل وسجل اسم من اسماء الله الحسنى
» لو جريئ ادخل وحط نفسك في الموقف المستحيل